سری نگر ، 8/اکتوبر (ایس او نیوز /ایجنسی) جموں و کشمیر کے سابق وزیر اعلیٰ نے بڈگام سیٹ سے کامیابی حاصل کر لی ہے، جبکہ گاندربل سیٹ پر وہ آگے بڑھ رہے ہیں۔ اسی دوران، نیشنل کانفرنس کے رہنما ڈاکٹر فاروق عبداللہ نے یہ اعلان کیا ہے کہ عمر عبداللہ جموں و کشمیر کے وزیر اعلیٰ بنیں گے۔ فاروق عبداللہ نے کہا، "لوگوں نے اپنا فیصلہ سنا دیا ہے، اور اب ہمیں جموں و کشمیر کے مسائل کو حل کرنا ہے۔"

انہوں نے کہا، ’’میں سب کا شکر گزار ہوں کہ لوگوں نے انتخابات میں حصہ لیا۔ اللہ کا شکر ہے کہ نتیجہ آپ کے سامنے ہے۔ یہاں عوام کا راج چلے گا، پولیس کا راج نہیں چلے گا۔ عمر عبداللہ وزیر اعلیٰ بنیں گے۔‘‘

انہوں نے کا مزید کہا، ’’ہمیں بے گناہ لوگوں کو جیل سے نکالنا ہے، سچ بولنے پر جیل میں بند میڈیا والوں کو نکالنا ہے، بس یہی گزارش ہے کہ نفرتیں نہ بڑھائیں، محبتیں بڑھائیں۔ ہمیں ہندوؤں اور مسلمانوں کے درمیان بھائی چارہ بڑھانا ہے۔‘‘

خیال رہے کہ عمر عبداللہ نے بڈگام اور گاندربل سیٹ سے الیکشن لڑا ہے۔ وہ بڈگام سیٹ سے جیت درج کر چکے ہیں جبکہ گاندر بل میں آگے چل رہے ہیں۔ بڈگام میں انہوں نے 36 ہزار سے زیادہ ووٹ حاصل کئے اور اپنے نزدیکی پی ڈی پی امیدوار آغا سید منتظر مہدی کو 18 ہزار سے زیادہ ووٹوں سے شکست دی۔ وہیں، گاندربل میں عمر عبداللہ 32 ہزار سے زیادہ ووٹ حاصل کر چکے ہیں اور پی ڈی پی کے امیدوار سے 10 ہزار ووٹوں سے آگے ہیں۔

الیکشن کمیشن کی ویب سائٹ پر سہ پور 3.30 بجے تک کے اعداد و شمار کے مطابق نیشنل کانفرنس نے 36 سیٹوں پر انتخابات میں کامیابی حاصل کی ہے جبکہ اس کی حلیف کانگریس نے بھی 6 سیٹیں جیتی ہے۔ اس کے علاوہ مزید 6 سیٹیں ایسی تھیں جن پر نیشنل کانفرنس پر آگے چل رہی تھی۔ بی جے پی 26 سیٹ جیت چکی ہے اور 3 سیٹوں پر آگے ہے۔